U Biełastoku biełarus vyviesiŭ łukašenkaŭski čyrvona-zialony ściah
U Biełastoku ŭbačyć čyrvona-zialony ściah Biełarusi možna chiba što na budynku Hienieralnaha konsulstva. Tamu źjaŭleńnie hetaha ściaha na bałkonie adnaho z žyłych damoŭ ździviła mnohich biełarusaŭ, što žyvuć u polskim horadzie.
Ściah vyviesiŭ Alaksandr — biełarus, jaki ŭžo dzieviać hadoŭ žyvie ŭ Polščy. Jon raskazaŭ, navošta vyrašyŭ heta zrabić, piša Most.
Jak akazałasia, Alaksandr paviesiŭ dziaržaŭny ściah Biełarusi jašče letam 2024 hoda. Pavodle jaho słoŭ, heta byŭ adkaz na niepryjemnuju situacyju, jakuju jon pieražyŭ u Biełastoku.
— U mianie byŭ vypadak: u Biełastoku mnie kryknuli: «Zamknij ruską mordę» («Zakryj ruskuju mordu»). Ja vyrašyŭ abaznačyć, što ja biełarus. Voś i ŭsio, heta ŭvieś moj pasył, — tłumačyć Alaksandr.
U Polšču Alaksandr pierajechaŭ u pošukach lepšaha žyćcia. Viartacca ŭ Biełaruś nie płanuje — kaža, što tam jamu niama da kaho jechać. Ale maryć źjechać u Aŭstraliju abo ZŠA.
— Ja źjechaŭ, kab źmianić svajo žyćcio. Tut ja na adnoj pracy zarablaju stolki ž, kolki ŭ Biełarusi zarablaŭ na dźviuch, — raspaviadaje jon.
Na pytańnie, čamu jon vybraŭ mienavita čyrvona-zialony ściah, a nie bieła-čyrvona-bieły, Alaksandr adkazvaje:
— Ja pryjechaŭ u Polšču da vybaraŭ 2020 hoda, kali pratestaŭ jašče nie było. Palityka mianie nie cikavić. Ja zanadta maleńkaje źviano, kab pra heta dumać.
Ja byŭ siratoj, mianie vychoŭvała babula, i jana zadavolenaja Łukašenkam. Tak, paśla vybaraŭ 2020 hoda ŭ Biełarusi była žachlivaja situacyja, ale ciapier takoje va ŭsim śviecie. Ja nie ŭdzielničaju ŭ padziele biełarusaŭ. Ja žyvu dla svajoj siamji.
Alaksandr kaža, što pretenzij da jaho z nahody vyviešanaha ściaha pakul nie pastupała. Adnak jon miarkuje, što paśla znosin z žurnalistami pytańni mohuć źjavicca.
Ciapier čytajuć
Biełaruskim top-čynoŭnikam u Vałhahradzie razdali kałaradskija stužki. Marzaluk zastaŭsia ź jabłynievaj FOTY8
Kamientary