«Ja mieŭ adnosna jaho iluzii». Były ministr zamiežnych spraŭ Litvy zhadvaje pra Uładzimira Makieja i pierapisku ź im u 2020-m
Były pasoł Litvy ŭ Biełarusi i ministr zamiežnych spraŭ Litvy Linas Linkiavičus u intervju «Radyjo Svaboda» raspavioŭ pra śpiecyfiku pracy ŭ Biełarusi, adnosiny z Uładzimiram Makiejem i pierapisku ź im padčas pratestaŭ 2020 hoda.
Śpiecyfika pracy ŭ Biełarusi
Pa słovach Linkiavičusa, padčas jaho pracy pasłom u Biełarusi pastajanna adčuvaŭsia kantrol i sačeńnie. «Časam sačeńnie nie zaŭvažnaje, ale jano jość. A ŭ Biełarusi jano pravodzicca tak, kab ty zaŭvažyŭ. Kali ty siadziš ź niekim i pješ kavu, to pobač taksama siadziać, kab ty bačyŭ. Heta psichałahična dušyć».
Druhoj asablivaściu zjaŭlajucca kantakty z aficyjnymi asobami. Litoŭskamu dypłamatu ciažka było zrazumieć, nakolki ščyra ź im razmaŭlajuć.
«Jany majuć niejki kaeficyjent praŭdy. Ty razmaŭlaješ i nie viedaješ, ščyry tvoj kaleha ci nie. I ja adrazu mahu skazać, što kali ty kamunikuješ u Minsku, to zrazumieła, što nie ščyry. Ci nie całkam».
A voś padčas sustrečaŭ za miažoju, jak zhadvaje Linkiavičus, razmova ź biełaruskimi aficyjnymi asobami była bolš adkrytaj i ščyraj.
Pra Uładzimira Makieja
Pamierłaha ministra Uładzimira Makieja Linkiavičus nazyvaje amal adzinaj davieranaj asobaj, ź jakoj možna było niešta abmiarkoŭvać.
«Faktaram zjaŭlajecca toje (i heta nie pustyja słovy), što jon mieŭ dostup da pieršaj asoby, dostup da jakoj byŭ abmiežavany. I faktar taho, što Makiej nie tolki moh ź joj kamunikavać, ale i mieŭ niejkija danyja, aznačaje, što jon mieŭ bolš infarmacyi.
Jaho papiaredni kaleha (Siarhiej Martynaŭ, ministr zamiežnych spraŭ u 2003-2012 hadach. — NN) moh razmaŭlać, rabić zajavy, ale heta ničoha nie značyła, bo heta nie ŭpłyvała na nastroj ci mierkavańnie pieršaj asoby».
Linkiavičus adznačaje, što jaho kamunikacyja z Makiejem była maksimalna adkrytaj: «Mnie padabałasia ź im kamunikavać. Kali my pra niešta damaŭlalisia, jon imknuŭsia pavodzić siabie tak, jak było damoŭlena. Z abodvuch bakoŭ byŭ davier».
Palityk pryznajecca, što mieŭ iluzii adnosna Makieja: «Kali my kamunikavali, ja mieŭ iluziju, što jon moža stać asobaj, jakaja b sadziejničała hetym pieramienam. I hetamu byli pieradumovy».
Linkiavičus zhadvaje, što apošni raz byŭ u Minsku ŭ lutym 2020 hoda. U toj čas litoŭskaja delehacyja naviedała miescy, dzie pražyvajuć litoŭcy — vioski Pielasa i Rymdziuny. Makiej dapamoh vyrašyć niekatoryja administracyjnyja prablemy. «Była prablema ź dziciačym sadočkam. I jon dapamoh ź miascovaj uładaj. Heta była takaja dobrazyčlivaść».
A ŭ Minsku byŭ pryjom u honar dnia naradžeńnia Tadevuša Kaściuški. «I heta ŭ Minsku. Kaściuška. Haspadarami pryjomu byli ZŠA, Polšča, Litva i Biełaruś. Dva ministry — ja i Makiej — prysutničali piersanalna. A dva druhija (ad ZŠA Pampiea, i ad Polščy Čaputovič) vystupili ź videazvarotami. Makiej vystupaŭ na biełaruskaj movie».
Kali jany z Makiejem raźvitvalisia, Linkiavičus paprasiŭ:
«Zaraz buduć vybary. Zrabicie narmalnyja vybary, kab nie było prablem, jak raniej. I ŭsio pojdzie dalej. Budzie dyjałoh. Budzie lepš dla Biełarusi».
Na što Makiej, pa słovach dypłamata, adkazaŭ: «Zrazumieła, my pastarajemsia. Zrazumieła, my tak zrobim».
Były ministr zamiežnych spravaŭ Litvy zaŭvažaje, što jon ščyra ŭ heta vieryŭ i dumaŭ, što Makiej asabista heta zrobić.
Esemeska Makieju padčas prastestaŭ 2020 hoda
Linkiavičus zhadvaje, kali pačalisia źvierstvy ŭładaŭ adnosna pratestoŭcaŭ, jon sprabavaŭ kamunikavać z Makiejem. «Ja napisaŭ jamu sms. «Słuchaj, moža ja pryjedu ŭ Minsk. Pasprabuju być maderataram dyjałohu». Jon adrazu nie adkazaŭ. Heta taksama pra niešta havoryć.
A na nastupny dzień jon napisaŭ sms: «Drennaja ideja. Nie treba jechać». Chiba što z kim treba paraiŭsia. Ja nie pamiataju dakładna tekst, ale ja pisaŭ «ty ž biełarus, tvaich ludziej źbivajuć». I tady jon taksama napisaŭ: «Ale kali pačali zvanić mnie dachaty i pahražać maim dzieciam i siamji, tak ja vyrašyŭ, što tak nie moža być». «Tak tabie ž pahražali zvankami, a tam źbivajuć fizična i navat zabivajuć. Adčuvaješ roźnicu?»
Zrazumieła, što ŭsie hetyja teksty taksama kantralavalisia, tak što jon nie moh prosta pisać. Ale jon zrabiŭ vybar…. Jon byŭ adnym ź niešmatlikich, ad kaho možna było niečaha čakać. Ale tak atrymałasia, što i jon nie zmoh. Ci jaho prymusili, kab jon nie zmoh».
Čytajcie jašče:
Makiej na pryjomie ŭ honar Kaściuški cytavaŭ Bžezinskaha. A Marzaluk zładziŭ jamu avacyju
Makiej — ministru Linkiavičusu: My kaliści žyli ŭ adnoj krainie, u VKŁ
«Pračytajcie jaje historyju». Łukašenku daviałosia apraŭdvacca pierad Pucinym za hieorhijeŭskija stužki11
Kamientary
Nia majučy na rukach kryvi biełarusaŭ Makiej ŭ 2020 mieŭ mahčymaść honarova ŭvajści ŭ historyju pieramohi Biełarusi nad dyktaturaj. A tak syjšoŭ u niebyćcie jak zvyčajny słužka ŭzurpatara.