Kino22

Halivudskija zorki źniali ŭ Polščy film ź lehiendaj «Brudnych tancaŭ». Bolš dušeŭnaje kino vy ŭbačycie nie chutka

Hety film ad znakamitaj aktrysy Emy Stoŭn zdymali za paru socień kiłamietraŭ ad biełaruskaj miažy, a ciapier jon źbiraje dziasiatki ŭznaharodaŭ i, napeŭna, budzie adznačany na «Oskary». Raskazvajem pra «Sapraŭdny bol» (Real Pain) — napeŭna, samuju kranalnuju historyju hetaha kinasiezonu.

Fota: kadr z trejlera

Ahavarymsia, što samoj Emy Stoŭn u filmie vy nie ŭbačycie — dvuchrazovaja łaŭreatka «Oskara» stała adnoj z pradziusaraŭ stužki. Sercam hetaj historyi možna nazvać Džesi Ajzienbierha, amierykanskaha akciora z uschodniejeŭrapiejskimi karaniami, najbolš viadomaha pa roli Marka Cukierbierha ŭ «Sacyjalnaj sietcy». Ajzienbierh napisaŭ scenar dla stužki, zrežysavaŭ film i syhraŭ u im adnu z hałoŭnych rolaŭ. A jašče ŭkłaŭ u asnovu «Realnaha bolu» minułaje ŭłasnaj siamji.

Heta historyja dvuch stryječnych bratoŭ, Devida (Džesi Ajzienbierh) i Biendžy Kapłanaŭ (Kiran Kałkin), jakija vypravilisia ŭ padarožža ŭ Polšču — darečy, film zrobleny ŭ supracoŭnictvie z polskimi kinošnikami. Devid i Biendžy jeduć u Polšču, kab ušanavać pamiać i šlach lubimaj babuli, polskaj jaŭrejki i byłoj źniavolenaj kancłahiera.

Dva braty vielmi roznyja pa charaktary. Devid maje «surjoznuju» pracu ŭ śfiery anłajn-rekłamy, u jaho jość žonka i syn, ale ŭ momant ščyraści mužčyna pryznajecca — nasamreč jon vielmi zajzdrościć Biendžy. Hieroj Kirana Kałkina žyvie ŭ maminym padvale, kuryć traŭku i nie maje ŭłasnaj siamji, ale pry hetym jon duša kampanii i centr uvahi ŭ padarožžy, kudy vypravilisia braty. Charyzma Biendžy navat zacianiaje pryvabnaść Maršy, inšaj udzielnicy tura i hieraini Dženifier Hrej, chacia vam i budzie składana paznać zorku «Brudnych tancaŭ» praz stolki hadoŭ i płastyčnych apieracyj.

Tym bolš dziŭna adkryvać, što za pavodzinami Biendžy nasamreč chavajecca vialiki bol — toj samy, što zhadany ŭ naźvie filma. Kino Ajzienbierha — heta ŭvohule daśledavańnie pryrody bolu i raspovied pra toje, što bol nasamreč adziny i ŭ ścienach kancłahiera, i ŭ žyćciach padarožnikaŭ 80 hadoŭ paśla. Vusnami svaich hierojaŭ jon razvažaje pra toje, ci varta dzialicca svaim bolem ź inšymi, bo kožnamu i tak składana ŭnutry. Adkaz na hetaje pytańnie — toje, jak Biendžy biezapielacyjna śćviardžaje ŭ inšaj scenie, što nasamreč nichto nie choča być samotny, i znachodzić u sabie siły padtrymać adnu z udzielnic tura.

«Sapraŭdny bol» — dušeŭnaja i piaščotnaja historyja, dzie znajšłosia miesca i humaru. Vam spadabajecca, naprykład, scena la manumienta hierojam Varšaŭskaha paŭstańnia, dzie Biendžy natchniaje kaleh pa tury zładzić vielmi tvorčuju fotasiesiju, ci padarožža bratoŭ u polskim ciahniku, dzie Biendžy vyrašaje — nie varta płacić za kvitki na ciahnik u Polščy, bo heta «naša kraina». 

I pry hetym Biendžy hłybiejšy za bolš spakojnych i źniešnie surjoznych udzielnikaŭ tura — mo za hłybiniu jaho i lubiła babula-polka. Chłopiec aburajecca tym, što ŭdzielniki padarožža, pryśviečanaha chałakostu, jeduć pa krainie ŭ ciahniku pieršaha kłasa, bo ich zadača — dakranucca da dośviedu prodkaŭ, jakija jechali ŭ łahier zusim u inšych umovach. Ci pravilna heta — pražyvać bol i haravać za inšych, kali ty ŭ nieparaŭnalna lepšaj situacyi? 

Ale i tut Ajzienbierh daje adkaz słovami adnaho z hierojaŭ: «My na tury pra chałakost. Kali ciapier nie čas haravać, ja nie viedaju, što tabie skazać». U niečym hetyja słovy nie pra chałakost, jany pra toje, što haravać i pražyvać bol mahčyma ŭ luby čas, kali hetyja pačućci ščyryja, a paśla hetaha možna i iści napierad.

Fota: kadr z trejlera

Najvyšejšaja na siońnia siarod uznaharodaŭ «Realnaha bolu» — heta «Załaty hłobus» dla Kirana Kałkina za rolu Biendžy. Svajoj pracaj u hetaj indy-stužcy, jakaja abyšłasia ŭ nievialikija 3 miljony dalaraŭ, Kałkin zabiaśpiečyŭ sabie abažańnie kinakrytykaŭ i lidarstva ŭ honcy za «Oskaram» najlepšamu akcioru druhoha płanu. Toje, jak hraje ŭ hetaj stužcy małodšy brat Makoleja Kałkina («Adzin doma») – inšaja płanieta ŭ akciorskaj pracy, i mienavita Kałkinu-Biendžy my abaviazanyja balučym finałam hetaj historyi.

Ale pierad hetym hieroi stužki naviedajuć polski Lublin, što za sotniu kiłamietraŭ ad biełaruskaj miažy, i kompleks byłoha kancłahiera Majdanek. U adnym ź intervju Ajzienbierh raskazvaŭ, što, pavodle słoŭ supracoŭnikaŭ kompleksa, aŭtary «Sapraŭdnaha bolu» — pieršyja, chto zdymaje film na terytoryi Majdaneka (mahčyma, havorka išła pra hulniavy žanr kino).

Ale šlach Devida i Biendžy idzie dalej, u horad Krasnystaŭ, dzie kaliści žyła ich babula. I jak kranalna, što tyja miaściny šmat značać i dla samoha Ajzienbierha, bo adtul rodam i jaho prodki. Miescami kino hučyć jak pryznańnie ŭ lubovi da Polščy: pad razumna padabrany saŭndtrek z nakciurnaŭ Šapena braty Kapłany raskryvajuć nam roznyja kutočki Varšavy, Lublina, Krasnystava.

Redka ŭ zachodnim kino pakazvajuć Uschodniuju Jeŭropu z hetaha boku — nie jak prystanak kryminalnikaŭ, dzivakoŭ i kamunistaŭ, a jak zvyčajny rehijon śvietu sa składanym minułym.

«Sapraŭdny bol» — heta jašče i razvahi pra sutnaść mižpakalenčaj traŭmy. Hety bol nie skončyŭsia dla siamji Kapłanaŭ, kali ich babula pakinuła Majdanek i Polšču, nie skončyŭsia jon i ź jaje śmierciu. Adzinaje, što dapamahło jaho kryšku sucišyć — heta nie biehčy ad bolu, a viarnucca tudy, dzie ŭsio pačynałasia, i pasprabavać jaho pražyć, što i robiać Devid i Biendžy. Urešcie rešt, kali ciapier nie čas haravać, to kali jašče?

«Naša Niva» — bastyjon biełaruščyny

PADTRYMAĆ

Kamientary2

  • babrujčanin
    23.01.2025
    ...red vydalena ..Ja z vohniennaj vieski
  • Josik
    23.01.2025
    Pahladzicie "I ŭsio vakoł aśviatliłasia" 2005h.

Ciapier čytajuć

Milicyja prapanuje, kab amnistyja zakranuła amal usich asudžanych za narkotyki5

Milicyja prapanuje, kab amnistyja zakranuła amal usich asudžanych za narkotyki

Usie naviny →
Usie naviny

Barysaŭskaja vakalistka ličyć, što 1000 rubloŭ — dobry zarobak dla maładoha śpiecyjalista. Ź joj mnohija nie pahadzilisia5

Łukašenka zabaraniŭ jurasobam pradavać bieśpiłotniki biez uzhadnieńnia ź dziaržaŭnymi orhanami

Sikorski: Niezaležnaść Biełarusi zaležyć ad vyniku vajny1

U Minsku kiroŭca chutkaj spravakavaŭ «paravoz» ź siami mašyn VIDEA

Studyja ź minskimi karaniami vypuściła videahulniu pra Halivud. U jaje možna hulać pa-biełarusku

Chto staić za pravakatyŭnaj supołkaj DoŁHB? Zdajecca, niepałochanyja školniki13

Źjaviłasia novaje «ekstremisckaje farmavańnie» — «Jamnicki fłot». Da jaho datyčny pamierły kalinoviec

Stvareńnie ahulnaha rynku naftapraduktaŭ Biełarusi i Rasii pieranieśli na hod1

Padsankcyjnaja biełaruskaja draŭnina kantrabandaj traplaje ŭ Vialikabrytaniju1

bolš čytanych navin
bolš łajkanych navin

Milicyja prapanuje, kab amnistyja zakranuła amal usich asudžanych za narkotyki5

Milicyja prapanuje, kab amnistyja zakranuła amal usich asudžanych za narkotyki

Hałoŭnaje
Usie naviny →

Zaŭvaha:

 

 

 

 

Zakryć Paviedamić