Da 370 rubloŭ za anłajn-kansultacyju: papularnyja ŭ instahramie daktary zmahajucca z kantrolem cen Minzdaroŭja
Z 1 lutaha Minzdaroŭja pačało rehulavać ceny na pryjomy daktaroŭ u pryvatnych miedycynskich centrach. Papularnyja ŭ instahramie biełaruski daktary sprabujuć nie hublać zarobki — pradajuć pryvatnyja anłajn-kansultacyi.
Ad novaŭviadzieńniaŭ čynoŭnikaŭ paciarpieli ŭ pieršuju čarhu papularnyja ŭ sacyjalnych sietkach daktary. Tamu što raniej u pryvatnych miedycynskich centrach asobna isnavała takaja katehoryja jak «vysokazapatrabavany śpiecyjalist» (tak nazyvali tych, chto mieŭ šmat padpisčykaŭ u instahramie). Pryjom u takich daktaroŭ moh kaštavać u 2-3 razy daražej u paraŭnańni sa zvyčajnym.
Aktyŭna prapanoŭvać svaje anłajn-pradukty pačali navat tyja instahram-daktary, jakich raniej śfiera anłajn-pasłuh nie cikavała. Usie jany padkreślivajuć, što pasłuha nie miedycynskaja, a infarmacyjnaja.
Adna ź biełaruskich hiniekałahiń pradaje svaje anłajn-kansultacyi jak žanočy nutrycyjołah. Pieršaja kansultacyja praciahłaściu 60-90 chvilin kaštuje ŭ jaje 370 rubloŭ.
Inšaja doktarka-błohierka prapanoŭvaje svaje 30-chvilinnyja hiniekałahičnyja kansultacyi pa 80-100 rubloŭ (u zaležnaści ad taho, jak doŭha pryjdziecca čakać).
Jašče niekalki hiniekołahaŭ aceńvajuć svaju paŭhadzinnuju anłajn-kansultacyju ŭ 60 rubloŭ.
Papularny ŭ sacyjalnych sietkach otałarynhołah vystaviŭ za paŭhadzinnuju kansultacyju 50 rubloŭ.
Praktykujučy doktar-dermatołah biare za anłajn-padbor dohladu skury 330 rubloŭ (VIP-taryf).
Isnujuć navat anłajn-kansultacyi ad praktołaha. Darečy, vielmi niatannyja: 270 rubloŭ za 20 chvilin razmovy. Pry hetym doktar udakładniaje: dasyłać intymnyja zdymki zabaroniena, bo heta parušaje biełaruskaje zakanadaŭstva. Tamu možna tolki paraicca ź śpiecyjalistam nakont vynikaŭ analizaŭ ci kałanaskapii.
U kułuarach instahramnyja daktary abmiarkoŭvajuć, što Minzdaroŭja vyrašyła kantralavać ceny ŭ pryvatnych miedycynskich centrach paśla skandału z hiniekałahiniaj-błohierkaj Alenaj Vajciachovič.
Adzin z surazmoŭcaŭ «Našaj Nivy» raskazaŭ, što čutki pra kantrol cen chadzili daŭno. Ale ŭ miedycynskaj śfiery ličać, što mienavita taja sprečnaja situacyja, jakaja nie adzin tydzień abmiarkoŭvałasia ŭ roznych sacyjalnych sietkach, stała katalizataram. I ŭ vyniku padziei, jakija mahli b raźvivacca bolš pavolna, adbylisia chutka.
Sama Vajciachovič naprykancy minułaha hoda raskazała ŭ błohu, što vyrašyła pryncypova pajści ź miedycyny z 1 lutaha 2025 hoda. Raniej jana vielmi emacyjanalna adreahavała na navinu pra kantrol cen ad Ministerstva achovy zdaroŭja.
Doktarka paskardziłasia ŭ sacsietkach, što joj niepryjemna razumieć, što ŭsio, čaho jana dabivałasia doŭhija hady, abiasceniena ŭ hrašovym ekvivalencie jaje rodnaj krainy.
— Jak narmalny śpiecyjalist moža pačać zarablać u try razy mienš? Čamu ja pavinna heta ciarpieć? U mianie pryjom kaštuje 120 rubloŭ, čamu ja pavinna pracavać za 44, bł**, rubli?! — vykazvałasia jana raniej.
Alena vyrašyła skancentravacca na sietkavym markietynhu i pradavać tavary «Hrynvej». Ale nadziej zarabić u śfiery miedycyny nie hublaje.
Jana taksama pradaje svaje kansultacyi: kansultacyja ŭ farmacie «pytańnie-adkaz» kaštuje 45 rubloŭ, pieršasny razbor kiejsa — 70 rubloŭ.
U Biełarusi pačnuć rehulavać ceny na kansultacyi daktaroŭ u pryvatnych miedcentrach. I heta nie adzinaje novaŭviadzieńnie
Pryvatnyja miedcentry šukajuć varyjanty abyści kantrol cen Minzdaroŭja, kab nie zhubić instahramnych daktaroŭ
«U mianie pryjom kaštuje 120 rubloŭ, čamu ja pavinna pracavać za 44, bł**, rubli?!» Daktary abmiarkoŭvajuć rehulavańnie cen
Ciapier čytajuć
33-hadovy Daniła Harkavy, jaki niečakana pakinuŭ Ofis Cichanoŭskaj, raskazaŭ pra svaju ankałohiju i siem apieracyj2
33-hadovy Daniła Harkavy, jaki niečakana pakinuŭ Ofis Cichanoŭskaj, raskazaŭ pra svaju ankałohiju i siem apieracyj
«Minimalny zarobak doktara ŭ Polščy bolšy, čym ja mieła ŭ biełaruskim pryvatnym centry». Doktarka Markiełava — pra pracu ŭ polskaj balnicy i vyrab naturalnaj kaśmietyki1010
Kamientary