«Pieradačy — supier, ale dapamoha ŭ 2025-m — heta najpierš dapamoha z vyzvaleńniem». Doŭhaja padsumavała pracu «Palitviazynki»
Paśla atrymańnia ad biełaruskich siłavikoŭ statusu ekstremisckaha farmavańnia spyniŭ pracu prajekt pa padtrymcy palitźniavolenych biełarusak «Palitviazynka». «My pryniali takoje rašeńnie, tamu što nie možam ryzykavać ludźmi ŭnutry Biełarusi. Dapamoža heta ci nie — my nie viedajem. Ale heta adzinaje, što my možam kantralavać. Ja i fejsbuk svoj vydaliła, tamu što jon taksama ekstremiscki», — pryznajecca stvaralnica «Palitviazynki» Jaŭhienija Doŭhaja.
Za čas isnavańnia «Palitviazynka» dapamahła bolš čym 200 žančynam i ich dzieciam, rodnym. Spytali ŭ Jaŭhienii Doŭhaj, jakimi kiejsami jany najbolš hanaracca i što płanujuć rabić dalej.
«Najpierš my hanarymsia tym, što zrabili temu palitźniavolenych biełarusak bačnaj. Nam było važna pakazać, jak pakutuje biełaruska i što takoje turma. Da 2020 hoda ja brała šmat intervju ŭ žančyn, jakija siadzieli pa 328 artykule (niezakonny abarot narkatyčnych, psichatropnych rečyvaŭ — NN). Ja razumieła, što homielskaja kałonija — sapraŭdnaje piekła. Tamu samaje pieršaje, da čaho my imknulisia — raskazvać pra strašnuju canu, jakuju płacić palitźniavolenaja biełaruska. Svaim zdaroŭjem, svajoj volaj, svajoj razłukaj ź dziećmi i blizkimi», — kamientuje Jaŭhienija.
Žurnalistka zhadvaje, jak ich znajšoŭ u tyktoku ŭkrainski spartsmien i zadanaciŭ 250 jeŭra, jakija paśla pieradali dźvium biełaruskam, što tolki vyjšli z turmy. Jak paśla pieršaha pamiłavańnia joj telefanavała siastra palitźniavolenaj Paliny Pałavinka i kryčała ŭ telefon, što dziaŭčat adpuskajuć. Jak dziakujučy ŭkrainskaj mastačcy i muzieju bierlinskaj ściany, jany zdoleli zrabić pastajannuju ekspazicyju pra palitźniavolenych biełarusak. Jak danaty prychodzili absalutna ad niečakanych ludziej, jakija śpiecyjalna adkładali hrošy na dapamohu žančynam.
«Ja pamiataju pieršyja dni isnavańnia inicyjatyvy. Čaho tolki my nie čuli! I što nazva niezrazumiełaja, i što nie treba dzialić ludziej na žančyn i mužčyn. Ale ŭ nas atrymałasia pierałamać heta ŭsio. Ja rada, što ŭ nas z kalažankami atrymałasia zrabić takuju inicyjatyvu, jakaja časam była dziorzkaj».
Jaŭhienija nie razumieje i navat złujecca, kali vinšujuć z «ekstremisckim statusam». Dla jaje tut niama ni kropli radasnaha.
«My zaŭsiody vystupali za dyjałoh, za humanitarnyja pieramovy. I ja dastatkova kamunikavała ź ludźmi, kab razumieć, što hety status ničoha dobraha nie niasie. Tamu my i vyrašyli spynić našu dziejnaść. Prajekt nie pavinien być važniejšym za čałaviečuju svabodu i zdaroŭje».
Pry hetym u baku ad temy palitviaźniaŭ Doŭhaja nie zastaniecca.
«Jak tolki budzie mahčymaść, budu havaryć pra ich, dapamahać na asabistym uzroŭni. Chacia ja liču, što ŭ 2025 hodzie nam patrebny inšy ŭzrovień dapamohi. Reabilitacyja — heta supier, dapamoha pieradačami — taksama supier. Ale heta nie toje, što nabližaje vyzvaleńnie. Tamu dapamoha ŭ 2025-m — heta najpierš dapamoha z vyzvaleńniem. Vydzirać heta vyzvaleńnie, pieramovy, vynosić heta pytańnie na inšy ŭzrovień».
«Stała strašna, što pad šum vajny pra našych žančyn zabuducca». U siecivie źjaviŭsia pryhožy mastacki prajekt, pryśviečany palitviaźniam
U rasijskuju bazu vyšuku za paŭhoda dadali bolš za 1200 biełarusaŭ. Šmat viadomych proźviščaŭ
«Ja nie dumała, što heta budzie nastolki doraha». Kolki hrošaj vydatkoŭvajuć blizkija palitviaźniaŭ na ich padtrymku ŭ SIZA i turmie?
Kamientary
A voś navošta było zakryvać inicytyvu - ščyra niezrazumieła. Łukašysty, jak i ŭ vypadku "Śpisaŭ Akreścina", plaskajuć u ładki stojačy, bo našaje samazabojstva - heta zvyšmeta dla ich.