«Што лыбішся, байцуха?» Кікбаксёр Ганін расказаў, як яго ўдарыў ахоўнік жодзінскага ізалятара
Нядаўна з 10 сутак выйшлі прызёр алімпіяды, дзесяціборац Андрэй Краўчанка і МСМК па кікбоксінгу Іван Ганін, шматразовы пераможца міжнародных спаборніцтваў.
Чытайце таксама: Здзекі ў Жодзіне з алімпійскага прызёра Краўчанкі: Пакуль вялі па калідорах у камеру, прымусілі прысядаць 400 разоў
Вядома, што ў Жодзіне Ганіна біў адзін з ахоўнікаў — пра гэта расказваў Андрэй Краўчанка, які тое бачыў. Гісторыю «Нашай Ніве» пацвердзіў сам Ганін.
«Там [у Жодзіне] нам зладзілі калідор здзекаў, дзе, каб дайсці да камеры — а гэта метраў 400, — трэба было то ў поўным прысядзе ісці, то выскокваць з прысяду, то стаяць, каб таз быў на ўзроўні калень. Карацей, поўны цыкл цяжкай нават для падрыхтаванага чалавека нагрузкі, пры гэтым, неўласцівай для суставаў — кажу як чалавек, які двойчы «рамантаваў» уласныя калені. Гэта пагражала праблемамі з каленямі ўсім удзельнікам.
І вось у нейкі момант мы прысядалі ў калідоры з выцягнутымі наперад рукамі. А калідор там вузкі, ахоўнік хадзіў туды-сюды, трэба было прыбіраць рукі, каб ён аб іх не цёрся. У нейкі момант ён спыніўся насупраць мяне і глядзіць. А ў мяне з’явілася ўсмешка на твары, ну што яшчэ. Тады ён ударыў мяне ў жывот. Здавалася, што цэліў у сонечнае спляценне, але прамазаў, ударыў ніжэй і лявей. Вядома, нічога ён мне не прабіў: ні дыханне не збіў, ні болю не даставіў, хаця замахваўся ад душы. І мне так ад гэтага смешна стала, што ён нічога не дабіўся, што я нават не думаў біць у адказ, хаця і маю баксёрскія рэфлексы, а накіраваў усю энергію на тое, каб не зарагатаць ва ўсю моц. Адзінае, што апусціў локці ўніз на выпадак, калі б ён захацеў ударыць яшчэ раз у печань ці селязёнку.
Ён яшчэ на мяне глядзіць і кажа: «Што лыбішся, байцуха?» Ён потым так мяне не адзін раз называў», — расказаў Ганін.
Ганін расказвае пра турэмны вопыт з цудоўным гумарам, глядзіце на відэа:
Баксёр кажа, што ў камеры спрабаваў займацца фізкультурай, але ўдавалася не ўсё.
«Нас было сямёры у камеры на 4 месцы, мы троху спрабавалі рухацца, хацелася трэніравацца. Але паветра вельмі мала, калі інтэнсіўна займацца, то спальваецца ўвесь кісларод, няма чым дыхаць. Рабілі гімнастыку для спіны. Андрэй Краўчанка з хлопцам-сукамернікам мераўся сіламі: адціскаліся ад падлогі па 300 разоў этапамі. Але вельмі моцна балелі калені пасля нагрузак у прыёмны дзень», — рэзюмуе баксёр.
«Прачытайце яе гісторыю». Лукашэнку давялося апраўдвацца перад Пуціным за георгіеўскія стужкі11
Каментары