Берасцеец звярнуўся ў камісію па вяртанні і прыехаў у Беларусь. Прысуд — калонія
У судзе Маскоўскага раёна Брэста да аднаго года калоніі за абразу Лукашэнкі асудзілі 30-гадовага Ігара Неміровіча. Справу за фота з «абразлівым надпісам» у інстаграме разглядалі проста ў берасцейскім СІЗА, піша «Вясна». Вядома, што берасцеец вярнуўся ў Беларусь праз зварот у камісію па вяртанні, але гэта не выратавала яго ад пераследу.
Першы раз Ігара Неміровіча затрымалі на пачатку мая 2022 года і адразу змясцілі пад хатні арышт, але ён збег і з'ехаў.
Восенню гэтага года ён звярнуўся ў камісію па разглядзе зваротаў беларусаў, якія знаходзяцца за мяжой, і вярнуўся дадому, але гэты факт не прызналі «безумоўнай падставай для высновы аб яго раскаянні».
27 верасня 2023 года яго зноўку затрымалі і змясцілі пад варту.
Згодна з версіяй абвінавачвання, 10 жніўня 2020 года Ігар Неміровіч размясціў у інстаграме фота з тэкстам, які «ў непрыстойнай форме прыніжае гонар і годнасць Аляксандра Лукашэнкі».
На працэсе Ігар віну прызнаў цалкам і распавёў, што з мая да жніўня 2020 года ён не жыў у Беларусі. Пра падзеі, якія адбываліся на радзіме, берасцеец даведваўся са сродкаў масавай інфармацыі.
«Паддаўшыся негатыўным эмоцыям», ён размясціў у сацыяльнай сетцы Instagram фотавыяву «абразлівага характару» ў дачыненні да Аляксандра Лукашэнкі. Раней, пры допыце яго ў якасці абвінавачанага, ён адмаўляў сваё дачыненне да гэтага, «паколькі баяўся магчымага надыходу крымінальнай адказнасці». Але, паводле Неміровіча, па сканчэнні пэўнага часу ён «усё пераасэнсаваў».
З матэрыялаў справы стала вядома, што выяву з Лукашэнкам міліцыянты знайшлі на старонцы Неміровіча 28 сакавіка 2022 года, бо тая сторыз ад 10 жніўня 2020 года была замацавана ў «актуальных».
Суддзя Марыя Аліферук прызначыла Ігару Неміровічу адзін год калоніі ва ўмовах агульнага рэжыму.
Чытайце таксама:
У панядзелак — суд над дзяўчынай, што вярнулася з Польшчы. Яе вінавацяць па васьмі артыкулах КК
Генпракуратура распавяла пра чарговае пасяджэнне «камісіі па вяртанні»
Цяпер чытаюць
У кадр зноў трапіла, якім памерам шрыфта для Лукашэнкі друкуюць выступы, каб ён бачыў11
Каментары