«Usie padumali, što heta teatralnaja pastanoŭka». Jak AMAP zatrymlivaŭ udzielnikaŭ kancerta pad Smalavičami
13 lutaha na bazie adpačynku «Ahaniok», što pad Smalavičami, amapaŭcy zatrymali ŭdzielnikaŭ kancerta, na jakim musili vystupić hurty «Raźbitaje serca pacana», Panska Moc, Ok-Band, śpiavačka LEAR. U MUS padzieju acharaktaryzavali koratka: «Aktyvisty destruktyŭnych telehram-kanałaŭ sabralisia pad vyhladam viečarynki».
U vyniku amal usich, akramia niepaŭnaletnich dziaciej i maładych maci, jakich adpuścili, siońnia pačali sudzić, pryznačajučy sutki i štrafy. Mieniedžarka hurta «RSP» Nastaśsia Dol, što vyzvaliłasia z žodzinskaha izalatara sa štrafam u 30 bazavych, raspaviała «NN» padrabiaznaści taho viečara.
«13 lutaha ŭ 20.00 pačała śpiavać LEAR. Paśla jaje na scenu vyjšli chłopcy z «RSP». Jany paśpieli vykanać usiaho adnu pieśniu «Bieh», jak u pamiaškańnie ŭvarvałasia kala 30 amapaŭcaŭ i inšych supracoŭnikaŭ milicyi. Jany ničoha nie tłumačyli, prosta zahadali ŭsim stać tvaram da ściany i pačali zabirać u ludziej telefony», — zhadvaje Nastaśsia.
Jana kaža, što pieršyja chviliny hledačy i artysty dumali, što adbyvajecca šou ad «RSP», niejkaja teatralnaja pastanoŭka, jakaja chutka skončycca. Ale nieŭzabavie stała zrazumieła, što ŭsio heta pa-sapraŭdnamu. Amal usich udzielnikaŭ advieźli ŭ Smalavickaje RAUS, dzie jany prasiadzieli ŭ aktavaj zale da nastupnaha dnia.
«My pastajanna čuli tam ad supracoŭnikaŭ milicyi ich viersiju padziej: što my sabralisia na niesankcyjanavanaje mierapryjemstva, kab vykazvać svajo niezadavalnieńnie dziejnaj uładaj. Na nas skłali pratakoły pad kapirku — 1-ja častka artykuła 23.34 KaAP. Mianie i ŭdzielnikaŭ hurta pavieźli ŭ žodzinski izalatar kala 17:00 14 lutaha. Z momantu zatrymańnia nas, viadoma, nie karmili. Ale chacia b vadzili ŭ prybiralniu, dzie my mahli pić vadu z-pad krana. Tolki viečaram nastupnaha dnia ŭžo ŭ Žodzinie dali kisłaj kapusty».
U kamiery na vosiem miescaŭ Nastaśsia apynułasia jašče ŭ kampanii čatyroch dziaŭčat.
«Heta vielmi jarki ŭspamin, bo my byli ŭ palčatkach, palito i kurtkach, ale nijak nie mahli sahrecca. Usie pračynalisia ad choładu: matracaŭ nie było, my spali na žaleznych narach. A batareja hreła zusim słaba», — raskazvaje Nastaśsia.
Sud nad Nastaśsiaj ciahnuŭsia kala piaci chvilin, i jana ščyra ździviłasia, što joj dali štraf. Jaje kaleham pašancavała mienš: užo viadoma, što śpiavačcy LEAR i kłavišniku, vakalistu «RSP», akcioru Paŭłu Haradnickamu i basistu Andreju Vosipčyku prysudzili 15 sutak.
Čamu AMAP «nakryŭ» kancert? Nastaśsia kaža, što sami milicyjaniery namiakali, što ich «zdali» z farmuloŭkaj «tam budzie adbyvacca niešta zabaronienaje». Pry tym što raniej prablem z kancertami na hetaj ža bazie adpačynku nie było, u takim farmacie viečaryny prachodzili tam užo nie pieršy raz.
«Nibyta heta źviazana sa źmienaj ułaśnika punkta. Ale heta ŭsio vyklučna padazreńni», — kamientuje Nastaśsia.
-
«Miakka kažučy, mianie tresła». Biełaruska atrymała rachunki na 40 tysiač jeŭra za čatyry dni ŭ šviejcarskaj balnicy
-
«Atrymlivajem abryŭki infarmacyi, u nas niama suviazi». Siastra Maryi Kaleśnikavaj raskazała apošnija naviny pra jaje
-
Vatykan zaprasiŭ Śviatłanu Cichanoŭskuju na pachavańnie Papy Franciška
33-hadovy Daniła Harkavy, jaki niečakana pakinuŭ Ofis Cichanoŭskaj, raskazaŭ pra svaju ankałohiju i siem apieracyj4
33-hadovy Daniła Harkavy, jaki niečakana pakinuŭ Ofis Cichanoŭskaj, raskazaŭ pra svaju ankałohiju i siem apieracyj
«Minimalny zarobak doktara ŭ Polščy bolšy, čym ja mieła ŭ biełaruskim pryvatnym centry». Doktarka Markiełava — pra pracu ŭ polskaj balnicy i vyrab naturalnaj kaśmietyki1313
Kamientary