Pieršy dzień vialikich taryfaŭ Trampa: inviestary pazbaŭlajucca ad dalara i ablihacyj ZŠA

Prezident hłabalnaj łahistyčnaj kampanii Flexport Sańnie Manders patłumačyŭ, što pad novyja taryfy trapiać tavary, jakija nie paśpieli pahruzić na sudny da pačatku dziejańnia novych taryfaŭ — to bok mnohija hruzy, što znachodziacca na šlachu ŭ ZŠA, buduć abkładacca taryfami pa papiarednim režymie. Praŭda, niekatoryja bolš vuzkija taryfy Tramp uvioŭ raniej, i jany ŭžo dziejničajuć.

Fondavyja rynki «raspradajuć Amieryku»

Na fondavaj biržy taryfy pryviali da novaha padzieńnia.

Jeŭrapiejskija akcyi ŭpali ŭ čakańni niepaźbiežnaj ekanamičnaj škody ad handlovaj vajny, jakaja zakranuła navat rynak ablihacyj. Panjeŭrapiejski indeks STOXX 600 ranicaj upaŭ na 2,5%, straciŭšy ŭsie pośpiechi papiaredniaha dnia.

Niamiecki DAX, adčuvalny da źmienaŭ u suśvietnym handli, upaŭ na 4%, a ministr finansaŭ Hiermanii Jorh Kukis zajaviŭ, što krainie moža pahražać novaja recesija.

Brytanski indeks FTSE źniziŭsia na 3,3%, francuzski Cac 40 — na 4%. Akcyi enierhietyčnych kampanij upali na 3,8%, bo ceny na naftu ŭpali da najnižejšaha ŭzroŭniu za apošnija čatyry hady. Akcyi zdabyŭnych kampanij źnizilisia na 4%. Patańnieli i akcyi bujnych bankaŭ — trejdary padrychtavalisia da źnižeńnia pracentnych stavak Jeŭrapiejskim centrabankam na nastupnym tydni.

Akcyi vytvorcaŭ lekaŭ u Jeŭropie ŭpali paśla taho, jak Tramp, vystupajučy ŭčora na viačery Respublikanskaj partyi, paćvierdziŭ płany pa ŭviadzieńni «vialikich» taryfaŭ na ŭvieś farmaceŭtyčny impart.

Raniej leki nie abkładalisia taryfami. Tramp nie paviedamiŭ, kali i na kolki jon płanuje padniać padatki na impart farmaceŭtyčnaj pradukcyi, ale adnaho zhadvańnia było dastatkova: akcyi brytanskich vytvorcaŭ lekaŭ AstraZeneca i GSK stracili 4% koštu, samaja darahaja kampanija Jeŭropy Novo Nordisk, jakaja vyrablaje preparaty dla pachudańnia Ozempic i Wegovy, patańnieła prykładna na 5%. Stolki ž stracili francuzskaja farmaceŭtyčnaja hrupa Sanofi i niamieckaja bijatechnałahičnaja kampanija Sartorius.

Inviestary taksama «raspradajuć Amieryku» — pazbaŭlajucca ad amierykanskich dziaržaŭnych ablihacyj, jakija zvyčajna ličacca biaśpiečnymi aktyvami, addajučy pieravahu inšym formam zachavańnia źbieražeńniaŭ. Inviestary pierachodziać u zołata, šviejcarski frank i japonskuju ijenu — dźvie valuty ź vielmi nizkimi pracentnymi staŭkami, što robić ich tannymi dla zapazyčańnia.

Situacyja nahadvaje pačatak pandemii, kali inviestary taksama aktyŭna pradavali amierykanskija bondy. Dachodnaść pa ich dasiahnuła niečuvanych z 2013 hoda vyšyń — 4,8% pa 30-hadovych ablihacyjach — inakš kažučy, kab znajšlisia žadajučyja ich kupić, bondy ciapier abiacajuć biesprecedentnyja dachody ŭ budučyni. Analityki ciapier uvažliva sočać za tym, jak paviadzie siabie Kitaj, jaki vałodaje amierykanskimi dziaržablihacyjami na sumu ŭ 759 miljardaŭ dołaraŭ.

U Azii padobnaja karcina. Japonski Nikkei upaŭ na 3%, prykładna stolki ž straciŭ hankonhski indeks Hang Seng. Tajvański Taiex abrynuŭsia adrazu na 6,2%.

Na bolšuju častku kitajskaha impartu ciapier dziejničajuć biesprecedentnyja taryfy ŭ pamiery 104%.

U minułym hodzie abjom handlu tavarami pamiž ZŠA i Kitajem skłaŭ kala 585 miljardaŭ dalaraŭ. Ale ZŠA impartavali z Kitaja značna bolš — kala 440 miljardaŭ dalaraŭ, čym Kitaj z Amieryki (prykładna 145 miljardaŭ). Kitaj pakul nie źbirajecca sastupać i rychtuje novyja adkaznyja miery. Napiaredadni Piekin zajaviŭ, što budzie «zmahacca da kanca», i ŭvioŭ adkaznyja pošliny na amierykanskija tavary ŭ pamiery 34%, a ŭ sieradu Ministerstva finansaŭ Kitaja abviaściła ab uviadzieńni dadatkovych 84-pracentnych taryfaŭ na ŭsie tavary, što impartujucca z ZŠA. Jany ŭstupiać u siłu ŭžo z 10 krasavika.

Piekin apublikavaŭ zajavu, u jakoj adznačajecca, što ZŠA nie zmohuć vyrašyć takija prablemy, jak deficyt handlovaha bałansu i «niedastatkovaja kankurentazdolnaść pramysłovaści» z dapamohaj taryfnych mier.

Adnačasova Kitaj padkreśliŭ, što zaŭsiody ličyŭ kitajska-amierykanskija handlovyja adnosiny «ŭzajemavyhadnymi», najaŭnaść napružanaści pamiž handlovymi partniorami — źjava naturalnaja, i jon hatovy da dyjałohu z Vašynhtonam dziela vyrašeńnia supiarečnaściej. «U handlovaj vajnie niama pieramožcaŭ, — havorycca ŭ zajavie Ministerstva handlu Kitaja. — Kitaj nie imkniecca da vajny, ale ŭrad nikoli nie dapuścić, kab zakonnyja pravy i intaresy kitajskaha naroda byli parušanyja abo adabranyja».

Lvinaja dola kitajskaha impartu ŭ ZŠA prypadaje na smartfony, kampjutary, lityj-ijonnyja batarei, raznastajnyja cacki i hulniavyja prystaŭki. Adnak handal pamiž dźviuma krainami hetym nie abmiažoŭvajecca: kitajcy pradajuć amierykancam usio — ad drobnych šurupaŭ da bojleraŭ.

Šmatlikija ekśpierty pradkazvajuć, što eskałacyja handlovaj vajny pamiž dźviuma najbujniejšymi ekanomikami płaniety chutka pryviadzie ŭ tupik.

Jany skieptyčna aceńvajuć upeŭnienaść Trampa ŭ tym, što amierykanski rynak nastolki prybytkovy, što inšym krainam daviadziecca ciarpieć luboje taryfnaje jarmo, kab tolki jaho nie stracić.

Kitaju našmat praściej nie sastupać, čym inšym krainam: amierykanski rynak dla jaho — usiaho kala 2% VUP, i jość hihancki ŭnutrany rynak, na jaki možna abapiercisia, adznačajuć ekanamisty. U inšych krain zapas tryvałaści kudy mienšy. Ad taryfaŭ Trampa asabliva mocna paciarpieli niekatoryja krainy Paŭdniova-Uschodniaj Azii — u pryvatnaści, Vjetnam, tavary jakoha ciapier abkładajucca 46-pracentnaj impartnaj pošlinaj, i Kambodža (49%).

U Vjetnamie vyrablajecca kala 21% adzieńnia amierykanskaha rytejlera Gap, kala pałovy krasovak Nike i 39% krasovak Adidas. Značnymi vytvorčymi mahutnaściami ŭ krainie vałodaje i Samsung.

Jeŭrasajuz, tavary ź jakoha trapili pad 20-pracentny taryf, siońnia źbirajecca zaćvierdzić pošliny ŭ adkaz na šerah amierykanskich tavaraŭ — ad raskošnych jacht i matacykłaŭ da apielsinavaha soku i sojevych baboŭ.

Jany buduć uvodzicca pastupova i stanuć adkazam na pieršapačatkovy 25-pracentny padatak na impart jeŭrapiejskaj stali i aluminija, uviedzieny prezidentam Trampam u sakaviku. Adkaz na siońniašnija taryfy budzie abmiarkoŭvacca asobna.

• 2
• 0
• 3
• 4
• 2
• 0
• 0
• 0