Žančyna naradziła čužoje dzicia. Jakuju pamyłku zrabili ŭ klinicy padčas EKA
Žančyna ŭ Aŭstralii naradziła čužoje dzicia paśla taho, jak u klinicy pa lačeńni biaspłodździa joj vypadkova padsadzili embryjony inšaj žančyny. Incydent adbyŭsia ŭ miedycynskim centry Monash IVF u Bryśbienie, štat Kvinsłend, piša Bi-bi-si.
Jak paviedamlajuć aŭstralijskija ŚMI, pryčynaj błytaniny padčas štučnaha apładnieńnia staŭ čałaviečy faktar.
Klinika pryznała pamyłku, nazvaŭšy jaje «adzinočnym vypadkam», i zajaviła, što ŭžo pryniała dadatkovyja miery, kab praduchilić padobnyja incydenty ŭ budučyni.
«Ad imia Monash IVF chaču paprasić prabačeńnia za toje, što adbyłosia», — skazaŭ hienieralny dyrektar Michael Knaap, dadaŭšy, što ŭsie ŭ klinicy «spustošanyja» pamyłkaj.
Pavodle pradstaŭnika Monash IVF, prablemu vyjavili ŭ lutym, kali klijenty paprasili pieravieści zamarožanyja embryjony, što zastalisia paśla EKA, u inšuju kliniku.
«My vyjavili niapravilnuju kolkaść embryjonaŭ u schoviščy», — zajavili ŭ Monash IVF. Tam taksama paćvierdzili, što embryjon, uziaty ŭ inšaj pacyjentki, pamyłkova razmarozili i pieranieśli nie toj žančynie, u vyniku čaho jana naradziła čužoje dzicia.
Klinika pačała ŭnutranaje rasśledavańnie, incydent taksama pieradadzieny na razhlad miedycynskich rehulataraŭ.
Hienieralny dyrektar miedustanovy pry hetym zapeŭniŭ, što heta byŭ adzinočny vypadak.
Minułaha hoda heta ž klinika vypłaciła 56 młn aŭstralijskich dołaraŭ sotniam pacyjentaŭ, čyje embryjony pamyłkova źniščyli.
Padčas rasśledavańnia vyśvietliłasia, što kala 35% embryjonaŭ, jakija nasamreč byli narmalnymi i mahli pryvieści da paŭnavartasnaj ciažarnaści, pryznali defiektnymi ŭ vyniku pamyłkovaha skryninhu.
Nie pieršy vypadak
U lutym Chryścina Miurej z ZŠA padała ŭ sud na kliniku, dzie joj rabili praceduru EKA.
U vyniku pamyłki jana vynasiła i naradziła chłopčyka, jaki bijałahična joj nie naležaŭ.
Choć Miurej i abrany joj donar śpiermy byli biełymi, dzicia akazałasia afraamierykancam.
Takim čynam, zamiest ułasnaha małoha, jakoha jana čakała, žančyna stała mižvolnaj surahatnaj maci dla inšaj pary.
Paśla kansultacyj ź jurystami žančyna dobraachvotna admoviłasia ad apieki nad dziciom, pakolki ŭ jaje nie było šancaŭ asprečyć pravy bijałahičnych baćkoŭ.
Zaraz chłopčyk žyvie ź imi ŭ inšym štacie pad inšym imiem.
Ciapier čytajuć
33-hadovy Daniła Harkavy, jaki niečakana pakinuŭ Ofis Cichanoŭskaj, raskazaŭ pra svaju ankałohiju i siem apieracyj4
33-hadovy Daniła Harkavy, jaki niečakana pakinuŭ Ofis Cichanoŭskaj, raskazaŭ pra svaju ankałohiju i siem apieracyj
«Minimalny zarobak doktara ŭ Polščy bolšy, čym ja mieła ŭ biełaruskim pryvatnym centry». Doktarka Markiełava — pra pracu ŭ polskaj balnicy i vyrab naturalnaj kaśmietyki1313
Kamientary
A ŭ dadzienym kankretnym vypadku technałohija dazvalaje naradzicca novamu dziciaci. Niahledziačy na pamyłki, jakija časam zdarajucca, naradžajecca novaje žyćcio. Sapraŭdy, "miarzotna".