Лукашэнка: Ніякай вайны з Еўропай Пуцін не плануе. Калі б планаваў — я б дакладна ведаў
Аляксандр Лукашэнка заявіў, што Расія не збіраецца ваяваць з Еўропай. А калі б такія планы былі, то ён ведаў бы, таму што нападаць давядзецца праз тэрыторыю Беларусі. Але нядаўна Лукашэнка казаў, што загадзя не ведаў пра напад на Украіну.
Лукашэнка заявіў, што Расія і Беларусь «наеліся вайны», таму нападаць на краіны Еўропы яны не плануюць.
Ён пракаментаваў для расійскай прапагандысткі Вольгі Скабеевай асцярогі Еўрасаюза, што Расія можа напасці ў бліжэйшыя пяць гадоў.
«Можа, ім гэта трэба? А я вам скажу, што ніякай вайны Пуцін, кіраўніцтва Расіі не плануюць. І ніякай вайны праз пяць гадоў не будзе. Разумееш, мы наеліся на гэтым прыкладзе (на прыкладзе вайны ва Украіне. — НН). І нават ты, Воля, баец самы сапраўдны (цяпер вайна ў СМІ ідзе жорсткая), ты што, падтрымала б праз пяць гадоў вайну супраць Польшчы? Не, навошта гэта нам трэба? Гэта ім трэба, каб напружваць сітуацыю», — сказаў Лукашэнка.
Ён заявіў, што ведаў бы аб планах Расіі, калі б такія былі.
«Слухайце, ну калі б збіраліся, то я б дакладна ведаў, таму што ўся аперацыя (была б праз беларускую тэрыторыю. — НН) — паўтары тысячы мяжа з прыбалтамі і палякамі. У нас такіх планаў няма.
Аднойчы я з Пуціным абмяркоўваў праблему па еўрапейцах, калі яны нас пачалі палохаць, што яны закрыюць Балтыку, і Расія не зможа гандляваць па Балтыцы. Я так у жарт кажу: «Ведаеш, Уладзімір Уладзіміравіч, давядзецца ваеннымі судамі суправаджаць сухагрузы нашы». Мы пажартавалі, пасмяяліся і ўсё.
Вось у такім плане. А даволі гэта рэальна, калі яны нас паспрабуюць зачыніць у парушэнне міжнародных правіл. Мы ж не лезем на іх тэрыторыю. І мы ніколі не планавалі ніякага нападу на Еўропу. Яны гэта цудоўна ведаюць», — адзначыў Лукашэнка.
Цікава, што зусім нядаўна, у інтэрв'ю амерыканскаму блогеру Марыё Науфалу, Лукашэнка так казаў пра пачатак вайны супраць Украіны:
«Мяне часта пытаюцца, ці ведаў я пра тое, што гэта вайна пачнецца ў лютым тры гады таму. Не, я не ведаў. Але, калі б ведаў, я б Украіну тады не абараняў. Таму што ў гэты момант ужо мы знаходзіліся ў стадыі эканамічнай вайны з Украінай».
Пры гэтым, як вядома, расійскія войскі выкарыстоўвалі для ўварвання тэрыторыю Беларусі.
У цяперашнім інтэрв'ю Скабеевай Лукашэнка таксама заявіў, што не ведаў пра планы нападаць з тэрыторыі Беларусі, а расійскія салдаты пайшлі на Кіеў, бо нібыта пасля вучэнняў ім было так зручней трапіць дадому.
У іншым інтэрв'ю, украінскай прарасійскай прапагандыстцы Дыяне Панчанка, Лукашэнка таксама заяўляў, што Пуцін не папярэджваў яго аб пачатку ўварвання, а толькі намякнуў за дзень да пачатку вайны.
Уварванне расійскіх войск з тэрыторыі Беларусі ў Украіну ён нядаўна тлумачыў прыкладна так: расійцы выходзілі з Беларусі пасля вучэнняў, але потым раптам звярнулі ў бок Украіны.
Цяпер чытаюць
У кадр зноў трапіла, якім памерам шрыфта для Лукашэнкі друкуюць выступы, каб ён бачыў12
Каментары