Глабальныя брэнды дамінуюць у беларускім сегменце грамадскага харчавання. Мары мясцовых рэстаратараў выйсці хоць бы на рэгіянальны ўзровень пакуль застаюцца марамі. Office Life вывучыў даныя гандлёвага рэестра і склаў топ-10 рэстаранных брэндаў, якія лідзіруюць сёння ў краіне па колькасці дзейных устаноў.
KFC
Колькасць устаноў: 83.
Калі з'явіўся ў Беларусі: 2015 г.
Паходжанне брэнда: ЗША.
Уладальнік (або франчайзі): «Бел Фуд сэрвіс», «КрэатыўФудС-Усход».
Найбуйнейшую ў краіне паводле ахопу сетку развіваюць два франчайзі. У «Бел Фуд сэрвісу», які не нашмат апярэдзіў сваіх калегаў па часе выхаду на рынак, сёння 54 рэстараны. У кампаніі «КрэатыўФудС-Усход» — 29. Большая частка рэстаранаў брэнда — 44 — працуе ў сталіцы.
COFIX
Колькасць устаноў: 48.
Калі з'явіўся ў Беларусі: 2018 г.
Паходжанне брэнда: Ізраіль.
Уладальнік (або франчайзі): «Урбан Снэкі».
Спробы стварыць буйную сетку кавярняў у Беларусі былі і раней. Але Cofix, якая працуе па ізраільскай франшызе, адназначна абышла ўсіх. Праўда, акрамя пяці кавярняў у Гродне і адной у Мінскім раёне, усе астатнія знаходзяцца ў межах МКАД.
BURGER KING
Колькасць устаноў: 45.
Калі з'явіўся ў Беларусі: 2015 г.
Паходжанне брэнда: ЗША.
Уладальнік (або франчайзі): «Бургер БК».
Гэты праект у сярэдзіне 2010-х вывеў на айчынны рынак уладальнік найбуйнейшага FMCG-дыстрыб'ютара «Мостра-груп» Сяргей Ткачук. Цяпер амаль палова ўсёй сеткі Burger King у Беларусі — 21 рэстаран — працуе ў Мінску.
«ДАДО ПІЦА»
Колькасць устаноў: 41.
Калі з'явіўся ў Беларусі: 2018 г.
Паходжанне брэнда: Расея.
Уладальнік (або франчайзі): «Піца Стар», «СмакСэрвіс груп».
Сеткай піцэрый, якую заснаваў расеец Фёдар Аўчыннікаў, на беларускім рынку кіруе кампанія Вадзіма Ткачука — сына рэстаратара Burger King, які згадваўся вышэй. Да таго як падпісаць франчайзінгавую дамову з расейцамі, Вадзім Ткачук некалькі гадоў «трэніраваўся» на іншым піцэрыйным брэндзе — Sbarro.
Нядаўна канкурэнцыю з «Дадо» яму паспрабавалі скласці ўладальнікі кампаніі «СмакСэрвіс груп», якія таксама набылі франшызу на брэнд. Яны паспелі адкрыць адну піцэрыю, але ўжо ў 2021-м іх кампанія і закусачная таксама сталі кантралявацца Ткачуком-малодшым.
З усёй колькасці ўстаноў «Дадо Піца» 19 размяшчаюцца ў Мінску.
DOMINO`S
Колькасць устаноў: 35.
Калі з'явіўся ў Беларусі: 2015 г.
Паходжанне брэнда: ЗША.
Уладальнік (або франчайзі): «Даміноспіца».
Яшчэ адну сетку піцэрыяў у краіне разам з партнёрамі развівае былы кіраўнік прадстаўніцтва Unilever, экс-уладальнік кампаніі-дыстрыб'ютара «Тыбетрэй» і таксама былы саўладальнік крамаў «Рублёўскі» Аляксей Лойка.
HOTFIX
Колькасць устаноў: 28.
Калі з'явіўся ў Беларусі: 2018 г.
Паходжанне брэнда: Беларусь.
Уладальнік (або франчайзі): «Хотфікс».
Гэтая кававая сетка — плён намаганняў беларускіх бізнэсменаў. Са сваім з'яўленнем яна адстала ад свайго галоўнага канкурэнта Cofix на некалькі месяцаў і працягвае дыхаць яму ў патыліцу ў гэтай нішы.
Сёлета яе ўладальнікі планавалі выхад на рынак Расеі, але праз сыход аднаго з партнёраў гэтага не здарылася.
MAK.BY
Колькасць устаноў: 27.
Калі з'явіўся ў Беларусі: 2023 г.
Паходжанне брэнда: Беларусь.
Уладальнік (або франчайзі): «КСБ Віктары рэстараны».
Mcdonald's прысутнічаў на беларускім рынку з 1996 года, перадаўшы ў 2014-м мясцовы бізнэс у франшызу казахстанцу Кайрату Баранбаеву. Летась ён быў затрыманы на радзіме, а ў сакавіку 2023-га асуджаны на 8 гадоў. Зрэшты, на пачатку ліпеня прысуд бізнэсоўцу скасавалі.
Пасля сыходу Mcdonald's на беларускія рэстараны спрабаваў прэтэндаваць яго правапераемнік у Расеі — створаная на базе мясцовых «Макаў» новая сетка «Вкусно — і точка». Але ў Беларусі вырашылі ісці сваім шляхам і пад кіраваннем ранейшага аператара перазапусцілі рэстараны пад брэндам Mak.by.
«ПІЦА ТЭМПА»
Колькасць устаноў: 22.
Калі з'явіўся ў Беларусі: 2002 г.
Паходжанне брэнда: Беларусь.
Уладальнік (або франчайзі): «Навіта».
Адзін з найстарэйшых сеткавых брэндаў на гэтым рынку з'явіўся ў рамках бізнэс-саюза, які стварыла для праектаў у аптовым («Сціма»), рознічным гандлі («Суседзі») і грамадскім харчаванні група беларускіх і літоўскіх прадпрымальнікаў. Самыя вядомыя імёны гэтага аб'яднання — Алег Дзялендзік і Алма Яўнцэмене. Апошняя доўгі час курыравала менавіта кірунак грамадскага харчавання.
«ВАСІЛЬКІ»
Колькасць устаноў: 18.
Калі з'явіўся ў Беларусі: 2010 г.
Паходжанне брэнда: Беларусь.
Уладальнік (або франчайзі): «Навіта».
У 2010 годзе пасля поспеху «Тэмпа Піца» яе ўладальнікі вырашылі інвеставаць і ў нацыянальную кухню. Гэты праект таксама атрымаўся паспяховым і цяпер генеруе большую частку даходаў «Навіты». У 2021-м яе ўладальнікі сур'ёзна вывучалі варыянт маштабавання «Васількоў» на расейскі рынак, але потым з невядомых прычын перадумалі.
DONER KING
Колькасць устаноў: 17.
Калі з'явіўся ў Беларусі: сярэдзіна 2010-х.
Паходжанне брэнда: Беларусь.
Уладальнік (або франчайзі): «Аўтсорсінг Карпарэйшн».
Замыкае топ прадстаўнік папулярнага сёння фармату шаўрмічных. У сетку інвеставалі ўладальнікі аднаго з прыватных мясаперапрацоўчых заводаў «Георгій і Сыны» і за мінулы час зрабілі яе лідарам у сваёй нішы.
Цяпер чытаюць
33-гадовы беларускі кікбаксёр-чэмпіён памёр ад рэдкай анкалогіі4
Каментары