Вялікія стрымінгавыя сэрвісы, як Netflix, Amazon Prime Video і Peacock, актыўна прыцягваюць папулярных YouTube-крэатараў для стварэння новых шоу.
Як піша The Wall Street Journal, стваральнікі кантэнту на YouTube пачынаюць займаць сваё месца ў Галівудзе. Вялікія стрымінгавыя платформы, такія як Netflix, Amazon Prime Video і Peacock, імкнуцца супрацоўнічаць з інтэрнэт-зоркамі, ствараючы новыя шоу і спін-офы.
Папулярныя крэатары ператварылі свой кантэнт у шматузроўневыя бізнэс-імперыі, зарабляючы на рэкламе, спонсарскіх кантрактах, жывых выступах і продажы тавараў. Гэта робіць іх асабліва каштоўнымі для стрымінгавых платформаў, якіх прыцягвае глабальная аўдыторыя, нізкія бюджэты і высокая якасць вытворчасці.
Паводле даных Nielsen, YouTube займае 11% усяго часу прагляду на падключаных тэлевізарах, што значна больш, чым 5,7% у 2021 годзе.
Галоўным штуршком да супрацоўніцтва стрымінгавых платформаў з папулярнымі стваральнікамі кантэнту на YouTube стаў поспех супрацоўніцтва Amazon Prime Video з адным з самых папулярных YouTube-крэатараў у свеце (373 мільёнаў падпісчыкаў на YouTube) MrBeast (Jimmy Donaldson, Джымі Дональдсан).
Фармат Beast Games нагадвае сумесь «Гульні ў кальмара» і класічных рэаліці-шоу, дзе ўдзельнікі змагаюцца за вялікія грашовыя прызы. У першым сезоне ўзялі ўдзел 456 гульцоў, якія змагаліся за галоўны прыз $5 мільёнаў — адзін з найбуйнейшых у гісторыі падобных праектаў.
Шоу стала хітом і прынесла Amazon больш за $100 мільёнаў прыбытку. За першыя чатыры тыдні пасля прэм’еры амаль кожны чацвёрты глядач Prime Video паглядзеў хоць бы адну серыю, а 60% гледачоў даглядзелі мінімум тры эпізоды.
Цяпер Amazon вядзе перамовы адносна 2-га і 3-га сезонаў, за кожны з якіх блогер патрабуе больш за $150 мільёнаў.
Тым часам Netflix таксама актыўна працуе з YouTube-зоркамі. У студзені платформа выпусціла шоу з Рэйчэл Акурса (Rachel Accurso), вядомай як Ms. Rachel, папулярнай стваральніцай дзіцячага кантэнту. Шоу стабільна знаходзіцца ў топ-10 самых папулярных праектаў Netflix у ЗША.
Peacock, які належыць Comcast, плануе запусціць чатыры камедыйныя шоу з аўтарамі YouTube, а Disney шукае сямейны кантэнт ад блогераў.
У пошуках новых стваральнікаў кантэнту Amazon набыў долю ў Spotter — стартапе, які дапамагае блогерам фінансаваць іх праекты. У студзені кіраўнік Amazon Studios Vernon Sanders (Вернан Сандэрс) выступіў на саміце Spotter, заявіўшы, што стваральнікі кантэнту павінны прапаноўваць не тое, што, на іх думку, хочуць стрымінгі, а тое, што сапраўды цікава іх аўдыторыі.
Amazon асабліва прывабны для YouTube-крэатараў, бо дазваляе ім прасоўваць свае тавары ў шоу, што адпавядае яго асноўнай бізнэс-мадэлі e-commerce. Гэта стварае цяжкасці ў перамовах з Netflix, які звычайна не дазваляе рэкламу тавараў у шоу.
Некаторыя ютуберы таксама асцерагаюцца, што стрымінгавыя платформы будуць кантраляваць іх кантэнт і змяняць яго на сваю карысць.
Як бы там ні было, апошнія падзеі паказваюць, што YouTube-зоркі, якіх раней Галівуд лічыў другаснымі, цяпер становяцца галоўнымі фігурамі ў індустрыі забаў.
Цяпер чытаюць
Мальдывы, Занзібар і Італія: куды панесла адпачываць прыхільнікаў Лукашэнкі13
Каментары