Вучоныя выявілі сувязь мікрапластыку з шэрагам цяжкіх захворванняў
Мікрапластык павялічвае рызыку развіцця мужчынскага і жаночага бясплоддзя, раку прамой кішкі, а таксама хранічнага запалення лёгкіх, якое можа перарасці ў рак лёгкіх.
Мікрапластык, памер часцінак якіх складае менш за 5 міліметры, шырока распаўсюджаны ў навакольным асяроддзі. Больш за ўсё яго ўтвараецца пры трэнні аўтамабільных шын аб дарожнае пакрыццё. Мікрапластык уключае розныя палімеры і мае розныя формы, такія, як фрагменты-абломкі, шарыкі і валокны. Так, мільёны мікравалокнаў трапляюць у ваду пры мыцці сінтэтычных тканін.
Як піша The Washington Post, паводле ацэнак, з 2000-х гадоў аб'ём сусветнай вытворчасці пластыку падвоіўся, і мяркуецца, што да 2060 года ён павялічыцца ўтрая. За апошнія некалькі гадоў мікраплыстык быў выяўлены ў яечках, плацэнце, лёгкіх і многіх іншых органах як чалавека, так і жывёл.
Амерыканскія навукоўцы з Каліфарнійскага ўніверсітэта ў Сан-Францыска знайшлі сувязь паміж мікрачасцінкамі пластыку, якія ў наш час знаходзяцца практычна ўсюды — у паветры, якім мы дыхаем, вадзе, якую мы п'ём, і ежы, якую мы спажываем, і цяжкімі захворваннямі. Даследаванне апублікавана ў навуковым часопісе Environmental Science & Technology.
Спецыялісты прааналізавалі каля 3000 папярэдніх даследаванняў, праведзеных як на мышах, так і на людзях, каб даведацца, як мікрапластык можа наносіць шкоду тром асноўным сістэмам чалавека — стрававання, дыхання і рэпрадукцыі.
Яны шукалі прыкметы змен у органах, а таксама прыкметы хранічнага запалення і акісляльнага стрэсу — станаў, пры якім парушаецца баланс антыаксідантаў у арганізме, што можа спрыяць развіццю захворванняў, уключаючы рак.
Аналіз дазволіў зрабіць выснову, што мікрапластык павялічвае рызыку развіцця мужчынскага і жаночага бясплоддзя, раку прамой кішкі, а таксама хранічнага запалення лёгкіх, якое можа перарасці ў рак лёгкіх.
Акрамя таго, даследаванне, праведзенае ў гэтым годзе, паказала, што ў пацыентаў з вялікай колькасцю мікрапластыку ў адной з асноўных артэрый была больш высокая рызыка перанесці інфаркт, інсульт або памерці па любой прычыне.
Даследаванне амерыканскіх навукоўцаў — толькі адзін з крокаў у доўгім працэсе ўстанаўлення таго, што менавіта мікрапластык робіць са здароўем чалавека. У той час як адны навукоўцы прызналі яго значным крокам наперад, іншыя адзначылі, што высновы могуць не цалкам адлюстроўваць рэальную карціну ўздзеяння мікрапластыку.
Яны звяртаюць увагу на тое, што большасць даследаванняў, ахопленых аглядам, былі прысвечаныя вывучэнню толькі аднаго тыпу мікрапластыку — сферычных шарыкаў, які лягчэй вывучаць у лабараторыі. У рэальным жыцці мікрапластык часцей прадстаўлены такімі формамі, як фрагменты-абломкі і валокны, і яны могуць мець іншыя негатыўныя наступствы для здароўя.
33-гадовы Даніла Гаркавы, які нечакана пакінуў Офіс Ціханоўскай, расказаў пра сваю анкалогію і сем аперацый4
33-гадовы Даніла Гаркавы, які нечакана пакінуў Офіс Ціханоўскай, расказаў пра сваю анкалогію і сем аперацый
«Мінімальны заробак доктара ў Польшчы большы, чым я мела ў беларускім прыватным цэнтры». Доктарка Маркелава — пра працу ў польскай бальніцы і выраб натуральнай касметыкі1212
Каментары