Выдавецтва Skaryna Press разам з ініцыятывай «33 кнігі для іншай Беларусі» падрыхтавала да публікацыі новы раман Змітра Вішнёва «Я — тое мяса, якое прыгатаваў Зміцер» і адкрыла перадзамову, паведамляе Bellit.info.
«Раман быў дапісаны яшчэ летась у Берліне, але я працягваў займацца ягонай рэдактурай і сёлета. У ім я разрэзаў сябе не шкадуючы, каб можна было пабачыць маё сэрца, якое пульсуе. Вельмі спадзяюся, што гэтая кніга не пакіне вас у спакоі», — дзеліцца навіной у сацсетках Зміцер Вішнёў і дзякуе сярод іншага Ірыне Герасімовіч і Гётэ-Інстытуту.
У анатацыі гаворыцца, што новы твор Змітра Вішнёва — гэта раман-лабірынт, які нагадвае адначасова падарожжа Дантэ ў пекла, плаванне Адысея дадому і камп'ютарную гульню-блукалку, у дзе трэба адшукаць выйсце і выжыць. Сустрэчы з памерлымі сябрамі і вядомымі асобамі: Улдысам Бэрзіньшам і Алесем Родзіным, Андрэем Бітавым і Эдвардам Мункам, Янкам Брылём і Джэймсам Джойсам — шлях героя ў загадкавай капсуле часу будзе пакручастым, яму давядзецца сутыкнуцца з уласнымі страхамі і спазнаць самога сябе.
Зміцер Вішнёў — паэт, празаік і мастак і выдавец. Адзін з сузаснавальнікаў легендарнага мастацкага руху «Бум-Бам-Літ», які ў 1990-я гады прагнуў разарваць межы літаратуры і імкнуўся да сінтэзу мастацтваў.
Аўтар кніг «Штабкавы тамтам» (1998), «Тамбурны маскіт» (2001), «Трап для сусьліка, альбо нэкрафэлічнае дасьледаваньне аднаго віду грызуноў» (2002), «Верыфікацыя нараджэння» (2005), «Фараон у заапарку» (2007), «Замак, пабудаваны з крапівы»(2010), «Шоргат жукоў» (2011), «Спітыя баркасы» (2014), «Калі прыгледзецца — Марс сіні» (2018). У 2014 годзе раман Das Brennessekhaus выйшаў па-нямецку.
Таксама займаецца жывапісам.
У 2007 годзе разам з Міхасём Башурам Зміцер Вішнёў стварыў выдавецтва «Галіяфы», якое перадусім выдавала беларускамоўную літаратуру і надавала асаблівую ўвагу дэбютным і забытым творам мінулага стагоддзя. Выдавецтва і кнігарня праіснавалі да 2022 года.
Цяпер жыве ў Германіі.
Цяпер чытаюць
Беларусь заняла другое месца па злачыннасці сярод еўрапейскіх краін. Як жа складалі такі рэйтынг?2
Беларусь заняла другое месца па злачыннасці сярод еўрапейскіх краін. Як жа складалі такі рэйтынг?
«Мінімальны заробак доктара ў Польшчы большы, чым я мела ў беларускім прыватным цэнтры». Доктарка Маркелава — пра працу ў польскай бальніцы і выраб натуральнай касметыкі77
Каментары