Паглядзіце, як раскошна жыла Бондарава ў сталіцы за 30 рублёў. Цяпер не будзе
Пасля адлічэння з універсітэта Вольга Бондарава страціла і права на пакой у студэнцкім інтэрнаце. Даносчыцы, якая хвалілася сацыяльнымі прывілеямі, што давала ёй дзяржава, цяпер давядзецца шукаць новае месца жылля.
У 2022 годзе даносчыца паступіла на філалагічны факультэт Беларускага дзяржаўнага педагагічнага ўніверсітэта, дзе да апошняга часу вучылася на бюджэце на дзённым аддзяленні па спецыяльнасці «Беларуская мова і літаратура». Пры залічэнні жыхарка Гродна атрымала месца ў інтэрнаце, які размяшчаецца ў студэнцкай вёсцы ў Пятроўшчыне.
26 сакавіка 2025 года Бондарава была асуджана на 13 сутак адміністрацыйнага арышту паводле «экстрэмісцкага» артыкула. Як паведамілі «Люстэрку» ў дэканаце філфака БДПУ, даносчыцу, якая два тыдні правяла на Акрэсціна, адлічылі з універсітэта.
Гэта значыць, што яна аўтаматычна страціла права на месца ў студэнцкім інтэрнаце і будзе вымушаная або шукаць новае жытло ў сталіцы, або вярнуцца ў Гродна.
Раней Вольга Бондарава жыла ў вельмі камфортных умовах, якія абыходзіліся ёй усяго ў 30 рублёў за месяц (так яна расказвала ў 2022-м), і нават хвалілася сваім жытлом у відэароліку на сваім ютуб-канале. Зняць ролік пра свой інтэрнат яе падштурхнула відэа, у якім крытыкаваліся тыя ўмовы, што прапануюцца іншагароднім студэнтам.
«Бесіць. Бесіць гэтае змагар’ё, што пастаянна ўсім незадаволенае, пастаянна шукае, да чаго прычапіцца, да самых дробязяў. Не падабаецца тут, у Беларусі — чамадан, вакзал, Львоў. Ці Варшава. Ці Вільня. Жывіце там, плаціце не 30 рублёў у месяц за інтэрнат, а 300 еўра», — абуралася даносчыца на чужыя скаргі.
«Я хачу паказаць свой пакой, дзе я жыву. У мяне няма ніякіх сувязяў — я проста прыехала, паступіла і пасялілася».
Вольга Бондарава паказала прасторныя калідоры свайго інтэрната і ўтульны блок на два пакоі з уласнай кухняй, туалетам і ванным пакоем. На змеевіку ў ванным пакоі ў яе сушыўся лазневы ручнік з эмблемай АМАПа.
Даносчыца была задаволеная далікатным рамонтам і тым, што ў блоку пры засяленні ўжо была ўся патрэбная абстаноўка і тэхніка, у тым ліку халадзільнік на кухні.
«Усё проста цудоўна. Яшчэ раз паўтаруся: гэта не за шалёныя грошы, гэта ўсё — частка дзяржаўнай сістэмы абароны студэнтаў».
«Дзяржава робіць максімум з таго, на што, напэўна, здольная, і не прымушае браць крэдыты на адукацыю. Не — дзяржава дае бясплатную адукацыю. Дзяржава дае магчымасць атрымаць і дадатковую адукацыю, і прафарыентацыю, і прапануе забаўляльныя праграмы, плюс вялікія зніжкі для студэнтаў, вельмі шмат пазнавальных мерапрыемстваў, розных канферэнцый, круглых сталоў, конкурсаў», — сцвярджала Бондарава.
Разжалаваная камуністка не ўлічыла, што ўсе яе сталічныя даброты і сацыяльныя прывілеі аплачаны дзяржавай з кішэні падаткаплацельшчыкаў, большасць з якіх, мяркуючы па 2020 годзе, з’яўляюцца тымі самі «змагарамі», якія выступаюць супраць рэжыму Лукашэнкі і якіх так шалёна ненавідзіць сама Бондарава.
Бондарава на сваёй шкуры зведала, як лёгка ў беларускай быццам бы сацыяльнай сістэме страціць усё. Ні ў Варшаве, ні ў Вільні не існуе «экстрэмісцкіх матэрыялаў», за лайк ці рэпост якіх можна трапіць на суткі, як не існуе і практыкі адлічэння за адміністрацыйныя правапарушэнні. У Беларусі ж ты не маеш ніякіх гарантый, нават калі шмат гадоў выказваеш сваю лаяльнасць рэжыму.
«Наша Нiва» — бастыён беларушчыны
ПАДТРЫМАЦЬЦяпер чытаюць
«Мінімальны заробак доктара ў Польшчы большы, чым я мела ў беларускім прыватным цэнтры». Доктарка Маркелава — пра працу ў польскай бальніцы і выраб натуральнай касметыкі66
Каментары
Хутчэй за ўсё яна прывалакла яго з сабой. З лазні. Дзе які-небудзь амапавец ёй аддаў свой ручнік.
Што на гэта скажа яе муж?