Новы трэнд тыктока: праціраць твар бананавай скуркай. Гэта сапраўды працуе?
Тыкток зноў здзіўляе: карыстальнікі с задавальненнем труць твар бананавай скуркай. Нібыта гэта «натуральны ботакс», які разгладжвае маршчыны, змагаецца з сухасцю і вяртае бляск. Гучыць дзіўна? Але пад хэштэгам #bananabotox ужо тысячы відэа, мільёны праглядаў і захапляльныя каментары.
Прачнуцца а чацвёртай раніцы, заклеіць рот стужкай, акунуць твар у ледзяную ваду — і… праціраць твар бананавай скуркай. Менавіта так выглядае раніца аднаго з фітнэс-інфлюенсераў TikTok Аштана Хола (Ashton Hall), відэа якога набрала амаль 30 мільёнаў праглядаў. І ён не адзіны, хто рэкламуе такі спосаб дагляду за скурай.
Цяпер у тыктоку пад хэштэгам #bananabotox ужо тысячы відэа, мільёны праглядаў і захапляльныя каментары аб карысці «скарбу з бананавай скуркі» і рэклама яе як «натуральнага ботаксу».
Прыхільнікі бананавай скуркі сцвярджаюць, што яна змагаецца з маршчынамі, выраўноўвае тон скуры, памяншае пачырваненні і надае эфект «свежасці».
Рэцэпт просты: узяць свежы банан, з’есці мякаць, а ўнутранай часткай скуркі праціраць твар кругавымі рухамі. Пакінуць на 15 хвілін, змыць халоднай вадой, нанесці крэм.
Некаторыя раяць выбіраць «старэйшыя», нават цёмныя бананы — маўляў, у іх скурка мякчэйшая і акажа лепшы эфект.
Што кажуць эксперты?
Дэрматолагі прызнаюць: бананавая скура сапраўды ўтрымлівае вітаміны А, D, Е, антыаксіданты (такія як аскарбінавая кіслата і лютэін), а таксама крухмал і лецыцін, якія могуць увільгатняць скуру і аказваць лёгкі супрацьзапаленчы і ачышчальны эфект.
Аднак дадаюць: гэты эфект — кароткатэрміновы, і чакаць глыбокага амаладжэння ці знікнення маршчын не выпадае. Карысныя рэчывы са скуркі банана не пранікаюць глыбока ў скуру, таму эфект будзе павярхоўны і недаўгавечны.
Касметолагі нагадваюць: бананавая скурка — гэта не касметычны прадукт. Пры кантакце з паветрам на ёй могуць хутка развівацца бактэрыі. Таму важна выкарыстоўваць толькі свежую скурку і наносіць яе на чыстую скуру.
Пры наяўнасці акне, пашкоджанай або вельмі адчувальнай скуры такі эксперымент можа выклікаць раздражненне або нават пагоршыць стан. Таксама варта ўлічваць магчымасць індывідуальнай рэакцыі — перад ужываннем пажадана праверыць сродак на невялікім участку скуры.
На пытанне, ці можа банан замяніць ботакс, дэрматолагі адназначна адказваюць: не. Ботакс працуе на мышачным узроўні, блакуючы перадачу імпульсаў, якія выклікаюць маршчыны. А бананавая скура дзейнічае выключна на паверхні скуры — як лёгкі натуральны тонік.
Бананы карысныя для здароўя скуры знутры: утрымліваюць вітаміны, мікраэлементы і клятчатку, якая падтрымлівае працу страўніка і агульны тонус арганізму. Гэта ўплывае на колер твару і агульны стан скуры.
Шпакоўскі пра саўладальніка «Варгеймінга» Кацалапава: Прафінансаваў пратэсты на 296 тысяч даляраў2
Каментары